O presente volume ofrece unha ollada crítica, global e asemade minuciosa, aos procesos de destrución do patrimonio arquitectónico en Galicia desde 1936 ata o cambio de milenio. Coa experiencia acumulada nun recoñecido traballo previo sobre as "Arquitecturas desvanecidas" antes de 1936, este equipo de especialistas en historia da arte e a arquitectura propón agora unha selección ampla e moi representativa do bosque de edificios con valor artístico que, sobre todo, en vilas e cidades, foron desaparecendo desde a Guerra Civil ata datas recenes. O conxunto de 57 capítulos que compoñen este libro aborda frontalmente os procesos e motivacións que conduciron a unhas perdas que, aínda que accidentais ás veces, case sempre foron resultado de actos intencionados amparados en excusas economicistas e de pretendido progresismo.